İnternetdə saxta profillə təhqir yazanlar cəzalanacaq

Kenul2012 · November 30, 2016

Azərbaycanda internet informasiya məkanında dövlət başçısının - Prezidentin şərəf və lәyaqәtini ləkələmə və ya alçaltma cəhdi cinayət məsuliyyəti yaradacaq.

Milli Məclisdə baş prokuror Zakir Qaralovun Cinayət Məcəlləsinin 323.1-ci (Azərbaycan dövlətinin başçısının-Azərbaycan Respublikası Prezidentinin şərəf və ləyaqətini kütləvi çıxışda, kütləvi nümayiş etdirilən əsərdə və ya kütləvi informasiya vasitəsində ləkələmə və ya alçaltma) maddəsinə əlavələrin edilməsi ilə bağlı təklifi Milli Məclisin bu gün keçirilən iclasında müzakirə olunub.

Layihəyə əsasən, bu maddədə “və ya kütləvi informasiya vasitəsində” sözləri “kütləvi informasiya vasitəsində və ya kütləvi nümayiş etdirildiyi halda internet informasiya ehtiyatında” sözləri ilə əvəz edilir. Buna görə qüvvədə olan sanksiya 500 manatdan 1000 manatadək miqdarda cərimə və ya 2 ilədək müddətə islah işləri və ya eyni müddətə azadlıqdan məhrum etmədir.

Qanuna 323.1-1 maddəsinin əlavə olunması da təklif edilir. Maddədə deyilir: “323.1-ci maddədə nəzərdə tutulmuş əməllər internet informasiya ehtiyatında saxta istifadəçi adlar, profil və ya hesablardan istifadə edərək kütləvi nümayiş etdirməklə törədildikdə, 1000 manatdan 1500 manata qədər cərimə və ya 3 ilədək azadlıqdan məhrum etmə ilə cəzalandırılır”.

Həmçinin Azərbaycanda internet informasiya ehtiyatında saxta istifadəçi ad və ya hesablardan istifadə edərək böhtan və təhqirlərə yol verməyin cinayət məsuliyyəti sayılması təklifi müzakirə olunub. Baş prokuror Zakir Qaralov tərəfindən Cinayət Məcəlləsinə 148-1 (İnternet informasiya ehtiyatında saxta istifadəçi adlar, profil və ya hesablardan istifadə edərək böhtan atma və ay təhqir etmə) maddəsinin əlavə edilməsi təklif edilib.

Yeni maddəyə əsasən, internet informasiya ehtiyatında saxta istifadəçi adlar, profil və ya hesablardan istifadə edərək kütləvi nümayiş etdirməklə böhtan atma və ya təhqir etmə 1000 manatdan 1500 manata qədər cərimə və ya 360 saatdan 480 saata qədər ictimai işlər, yaxud 2 ilədək müddətə islah işləri və ya 1 ilədək müddətə azadlıqdan məhrum etmə ilə cəzalandırılır.

Yeni maddənin “Qeyd” hissəsində isə göstərilir ki, bu maddədə “saxta istifadəçi adlar, profil və ya hesablar” dedikdə internet informasiya ehtiyatlarında, o cümlədən sosial şəbəkələrdə istifadəçinin şəxsiyyətini eyniləşdirməyə imkan verməyən, yəni ad, soyad və ya ata adına dair yalan məlumat yerləşdirilmiş və ya belə məlumatlar gizlədilmiş, habelə digər şəxsə aid məlumatlardan onun razılığı olmadan istifadə edilməklə yaradılmış istifadəçi adlar, profil və ya hesablar başa düşülür. Müvafiq olaraq Cinayət Prosessual Məcəlləsinə də uyğunlaşdırma düzəlişlər təklif edilir.

Deputat Fazil Mustafa deyib ki, dəyişiklik layihəsi çox aktual, son dərəcə vacibdir. O bildirib ki, bir sıra insanlar xaricdə oturaraq və ya gizli olaraq bu işi həyata keçirirlər: “Başqa ölkələr tərəfindən yönləndirilən saytlar var ki, onlarla bağlı da araşdırma aparmaq lazımdır. Ola bilər ki, böhtan atmırlar, amma ölkənin imicinə ziyan vururlar”.

Deputat Elmira Axundova qeyd edib ki, bu dəyişiklik ölkənin birinci xanımına və onun ailə üzvlərinə də şamil olunmalıdır: “Mənəviyyatdan uzaq olan şəxlər ölkə rəhbərini ünvanına təhqirlər, nalayiq sölər yazmaqdan çəkinmirlər. Bu halın vüsət almasına səbəb prezidentin humanistliyidir. Bu dəyişikliklə heç bir mətbu orqana məhdudiyyət qoymuruq. Bəzi şəxslər, hətta ölkənin birinci xanımı, prezidentin ailə üzvləri barəsində çox mənəviyyatsız yazılar yazırlar. Bununla bağlı hüquqi tədbirlər görülməlidir. Dəyişiklik layihəsi prezidentin ailə üzvlərinə də şamil edilməlidir”.

Deputat həmçinin vurğulayıb ki, bütün dünyada olduğu kimi, Azərbacyanda da məişət zorakılığı baş verir: “Statistikaya görə qadınlara öz ərləri tərəfindən zorakılıq halları artır. Belə insanlar cəzaya layiqdirlər, onlar ömürlük azadlıqdan məhrum edilməlidirlər. Buna görə də Cinayət Məcəlləsini bir sıra maddələrinə yenidən baxılmalıdır. Xüsusilə, ağır cinayət törədənlər, həyat yoldaşının başını kəsən, azyaşlıları zorlayanlarla bağlı ölüm hökmünün tətbiq olunmasının vaxtıdır”.

Milli Məclisin vitse-spikeri Bahar Muradova deyib ki, ölüm hökmünün bərpa olunmasına ehtiyac yoxdur.

Millət vəkili Məlahət İbrahimqızı isə 20 Yanvarla bağlı vikipediada çox yanlış məlumatların yer alıdığını deyərək, bunun qarşısının alınması təklifi ilə çıxış edib.

Millət vəkili eyni zamanda, Azərbaycanın tanınmış dövlət, ictimai-siyasi xadimləri barədə xoşagəlməz yazılar yazanların da cəzalandırlmasını təklif edib. Çıxış edən digər deputatlar da internetdə təhqirin yayılmasının yolverilməz olduğunu bildiriblər.

Hər iki layihə səsə qoyularaq qəbul olunub.

bizimyol.info

NOIR · November 30, 2016

Bu bizə aid deyil. "Yerli sakinlər" bir-birini doyunca təhqir edə bilərlər )

NOIR · November 30, 2016

"Qeyd" hissədəki açıqlamaya əsasən, hamımız saxta profil istifadəçisiyik. Və əgər "yerli sakinlərdən" yəni forumda qeydiyyatdan keçmiş userlərdən kimsə ünvanımıza təhqir yazarsa da, onu identifikasiya etmək, həmin şəxsə çıxıb, məsuliyyətə cəlb etmək imkanına malik deyilik. Əminəm ki, təhqirə vərdiş etmiş həmin userlər həmişəki qaydada davam edəcək, çəkinmədən təhqir edəcəklər.

323.1 maddəsinə dəyişikliklər labüd idi. Dövlət və hökümət rəmzləri mühafizə olunmalıdır, qorunmalıdır. Başqa bir hal məni düşündürür. (ilk postda da qeyd olunur ) bəs ölkə ərazisində yerləşməyən, kənar dövlərlərin ərazisində olan userləri aşkar etsələr, onlara necə çıxacaqlar. Yəqin xatırlayarsız, aprel ayında ermənilərə məxsus profillər forumu bərbad vəziyyətə salmışdı. Ölkənin nüfuzuna zərbə vuran, xalqın ədalət, ləyaqət hissini qıcıqlandıran nə qədər sözlər yazıldı və oxundu... Onlara cəza çatdı ?

Başqa məqam da var.

NOIR · November 30, 2016

Müşahidə etmisizsə, sosial şəbəkələr cəmiyyətdəki əhvalı, bir növ transformasiya edir. Özü də, mümkündür ki, hər iki istiqamətə.... Fərdin daxilindəki etiraz və narazılığı söz, fikir formasında realizə etməsi, təhlükəsizlik baxımından daha məqbuldur, nəinki bu etirazın küçə-meydanlara axması...Rusiyada KİV vasitələrindən yumoristlər, publisistlər daima bəzi ictimai xadimləri, deputatları, məmurları ifşa edir, gülüş obyektinə çevirir.... əhali ilə birgə gülürlər nöqsanlara. Heç kim də ölmür, nə gülməkdən nə də ağlamaqdan

Kenul2012 · November 30, 2016

3 часа назад, NOIR сказал:

Müşahidə etmisizsə, sosial şəbəkələr cəmiyyətdəki əhvalı, bir növ transformasiya edir. Özü də, mümkündür ki, hər iki istiqamətə.... Fərdin daxilindəki etiraz və narazılığı söz, fikir formasında realizə etməsi, təhlükəsizlik baxımından daha məqbuldur, nəinki bu etirazın küçə-meydanlara axması...Rusiyada KİV vasitələrindən yumoristlər, publisistlər daima bəzi ictimai xadimləri, deputatları, məmurları ifşa edir, gülüş obyektinə çevirir.... əhali ilə birgə gülürlər nöqsanlara. Heç kim də ölmür, nə gülməkdən nə də ağlamaqdan

Bizimkilərin ünvanına bir söz deyilsə xəncərlərinin qaşı düşər .

Erməni profilləri əbədi ban olundu.

NOIR · November 30, 2016

38 минут назад, Kenul2012 сказал:

Erməni profilləri əbədi ban olundu.

Böyük təsəllidir, minnətdarıq, çox sağ olun )

NOIR · November 30, 2016

9 часов назад, Kenul2012 сказал:

Yeni maddəyə əsasən, internet informasiya ehtiyatında saxta istifadəçi adlar, profil və ya hesablardan istifadə edərək kütləvi nümayiş etdirməklə böhtan atma və ya təhqir etmə 1000 manatdan 1500 manata qədər cərimə və ya 360 saatdan 480 saata qədər ictimai işlər, yaxud 2 ilədək müddətə islah işləri və ya 1 ilədək müddətə azadlıqdan məhrum etmə ilə cəzalandırılır.

bunu necə başa düşək ? zərurət olarsa, 1000 manat ödəyib təhqir etmək olar yoxsa...1500 manat ödəyib böhtan almaq olar (?)