Vətən

[LadyN]

Vətən əsgəri

 

Əminəm qələbə bizim olacaq,

Ordumuz torpağı geri alacaq.

Dağlıq Qarabağda zəfər çalacaq,

Səngərdə dayanan Vətən əsgəri.

 

Bəsdir, yetər artıq, qalx Azərbaycan,

Cana can vaxtıdır bu gün qana qan,

Deyib öz canını Vətənə qurban,

Səngərdə dayanan vətən əsgəri.

 

Qarabağ köməyə çağırır səni,

Təmizlə torpaqdan azğın düşməni.

Hər zaman qorusun ana Vətəni,

Səngərdə dayanan Vətən əsgəri.

Geriyə çəkilməz Vətən əsgəri.

 

[LadyN]

Ananın Yuxusu
Yuxuda görmüşdü ana oğlunu, 
Düşmənlə vuruşan igid əsgəri. 
Bu döyüş səhnəsi qorxutdu onu, 
Dəhşətli yuxuyla açdı səhəri. 

Ananın ürəyi sıxıldı yaman, 
Yığıldı başına qüssə, qəm, kədər.
 Yenə də qəlbində var idi güman, 
Oğlundan alacaq yaxşı bir xəbər. 

Bu bir həqiqətdir, bir acı gerçək. 
Gümanı səhv oldu, ümidi soldu. 
Oğlunu bayrağa bükülmüş görçək, 
Şəhid anasının gözləri doldu. 

Ağlama anacan, qoparma fəryad, 
Bu dərdi dağ belə daşıya bilməz. 
Hər kəsə əzizdir, şirindir övlad, 
Qəlblərdə yaşayar, şəhidlər ölməz.

 

[LadyN]

Ucalır göylərdə şanlı bayrağın. 

 Gözün aydın olsun, ey ana Vətən, 
Geriyə çəkildi o azğın düşmən. 
İşğalda deyilsən, nəhayat ki, sən. 
Azad nəfəs alır çəmənin, dağın, 
Ucalır göylərə şanlı bayrağın. 

Zalımdan qurtulduq bu da bir gerçək, 
Fərəhlən ağsaqqal, sevin ağbirçək. 
Hər bağın, hər bağçan açacaq çiçək, 
Yanacaq hər zaman sənin çırağın. 
Ucalır göylərə şanlı bayrağın. 

Çoxdan gözləyirdik bu gözəl anı, 
Zəfərlə qurtaran bu şad zamanı. 
Heç kimə vermərik Azərbaycanı. 
Qoy yansın əbədi odun, ocağın, 
Ucalır göylərdə şanlı bayrağın. 

Mərd, igid oğullar dağıdır, sökür, 
Düşmən təslim olur, belini bükür. 
Azadıq, xoşbaxtıq Allaha şükür! 
Yenə də bizimdir cənnət torpağın, 
Ucalır göylərə şanlı bayrağın. 

 

[LadyN]

Nailə Şahverdi