Elçin Əsgərov: Suriyada Sünni-Vəhhabi Qarşıdurması Var

[Blok]

“Suriyadakı proseslərin Azərbaycana daha çox təsir göstərəcəyi gözləniləndir”

Mümkün təhlükələri Publika.Az –a şərh edən Dini Qurumlarla İş üzrə Dövlət Komitəsinin (DQİDK) keçmiş sədr müavini, Dialoq və Əməkdaşlıq Uğrunda İslam Konfransı Gənclər Forumu Avrasiya Regional Mərkəzinin sədri Elçin Əsgərov hesab edir ki, bu təhlükə ehtimal ediləndir. Onun fikrincə, Suriyada baş verən hadisələr təkcə Azərbaycana yox, bütün İslam dünyasına təsir edir: “Müsəlman ölkələrində, xüsusilə Yaxın Şərq ölkələrində Suriyada yaranmış məzhəblərarası problem müzakirə olunur. Artıq biz bunun İraqa, Səudiyyə Ərəbistanına, Bəhreynə sirayət etdiyini görürük. Eyni zamanda, Azərbaycanda da bunun ayrı-ayrı elementlərini görürük”.

E. Əsgərov hesab edir ki, Azərbaycan Suriyadan sonra ilk olmasa da, növbəti hədəflərdən biri ola bilər. Onun sözlərinə görə, bu, ölkədə hər məzhəbdən olan insanların yaşaması və heç bir problem olmadan yaşaması ilə bağlıdır: “Bəzi ölkələr var ki, orda əhalinin böyük əksəriyyəti sünni, yaxud şiədir. Bəzi ölkələr də var ki, burda şiələrlə sünnilər yanbayan yaşayırlar. Bu, İraqdır, Bəhreyndir, o cümlədən Azərbaycan kimi ölkələrdir. Bu baxımdan, Suriyadakı prosesləri bu ölkələrə, o cümlədən Azərbaycana daha çox təsir göstərəcəyi gözləniləndir”.

“Suriyada məzhəb qarşıdurması yaradanlar bunu digər müsəlman ölkələrinə də köçürmək istəyəcəklər”

E. Əsgərov Suriyada əslində şiə-sünni qarşıdurması deyil, sünni vəhhabi qarşıdurması olduğunu bildirib. Onun sözlərinə görə, İraqda baş verənlər də həmçinin belədir. “Bəzi qüvvələr bunu şiə-sünni qarşıdurması kimi göstərmək istəyirlər. Amma əslində bu, şiə-sünni qarşıdurması deyil. Klassik, normal şiələrlə sünnilərin heç bir ölkədə ciddi problemləri yoxdur. Problem vəhhabi təriqətinə aid olan problemdir. Faktiki olaraq Suriyada şiələr azlıqdadır. Hakimiyyətdə olan qrup şiə deyil, nuseyridir. Əhalinin də böyük əksəriyyəti sünnidir. Vuruşan Suriya ordusu ilə müxalifət ordusunda üz-üz duranlar şiə və sünni deyil, sünni ilə sünni, konkret desək, vəhhabi sünnidir. O cümlədən, başqa müsəlman ölkələrində sünnilərlə vəhhabilərin problemləri var. Bir az da dərinə getsək, vəhhabilər özləri də bir neçə qrupa bölünür. Qarşıdurmaya meylli olanlar və əsasən bunları edənlər təkfirçilərdir. Vəhhabilər onları "xəvaric" adlandırır. Təkfirçilərin fərqi odur ki, özlərindən başqa digər bütün məzhəbləri, dinləri kafir elan edir, onları dindən çıxmış hesab edirlər. Bunların əqidəsi ondan ibarətdir ki, digərlərin öldürmək, mallarını qənimət kimi ələ keçirmək savabdır.Bütün İslam dünyasında baş verən qarşıdurmaların səbəbkarı da təkfirçilərdir” -deyə ekspert bildirib.

E. Əsgərov qeyd edib ki, təkfirçilər ilk olaraq şiələri yoldan azmış hesab edirlər: “Onlara görə sünnilər də bu qəbildəndir, amma şiələrə nisbətən daha az. Düşünürlər ki, sünnilərlə çağırış edilməlidir. Əgər onların təbirincə desək dinə qayıtmasalar onlar da kafir elan ediləcək. Amma bu gün şiə olmasa belə, onlar üçün özlərindən olmayan hər kəs kafirdir. Bu düşünülmüş və müsəlman dünyasını qarışdırmaq, təsir dairəsində saxlamaq, təzyiq etmək istəyən güclərin siyasətidir. Bu gün Suriyada məzhəb qarşıdurmasını yaradanlar bunu digər müsəlman ölkələrinə də köçürmək istəyəcəklər”. Ekspert Azərbaycanda Hacı Şahini ölümlə təhdid edənlərin də təkfirçi olduğunu bildirib.

Hədəfdə olan ölkələr: Bəhreyn, Səudiyyə Ərəbistanı, İraq və...

E. Əsgərov qeyd edib ki, Suriyada bu gün savaşan təkrifçilərin növbəti hədəfləri olan ölkələr var. “Bu günlərdə Ramazan Qədirov çıxış edərək bildirdi ki, Suriya bitən kimi Qafqaza gediləcək kimi çağırışlar var. Qafqaz dedikdə təkcə Şimali Qafqazı deyil, bütün Qafqaz nəzərdə tutulur. Şimali Qafqazda şiə yoxdur. Deməli, onlar burda sünnilərlə qarşı vuruşacaqlar. Ardınca Azərbaycana keçmək ehtimalları var. Bunun Azərbaycana sirayət etməsini istəyənlər var. Amma Azərbaycanın hədəfdə ilk sırada olduğunu demək çətindir. Hesab edirəm ki, qarşıda Bəhreyn, Səudiyyə Ərəbistanı, İraq, ondan sonra Şimali Qafqaz, ardınca da Azərbaycan gələ bilər. Amma bütün hallarda bu təhlükədə hədəflərdən biri Azərbaycandır”-deyə o bildirib.

Ekspert qeyd edib ki, Azərbaycandan Suriyaya döyüşməyə gedənlər də özləri ilə geriyə məzhəb davası gətirəcəklər: “Orda döyüşən azərbaycanlılar əqidəni bölüşürlər. O qədər bölüşürlər ki, özlərini öldürməyə belə hazır olurlar. Onlar Azərbaycana qayıtsa, burda ikiqat artıq qüvvə ilə vuruşmağa hazır olacaq”.

qafqazinfo