Raqif Abbasov: “Sosial şəbəkələr dövrümüzün reallığıdır” (MÜSAHİBƏ)

[interland]

"Qanunvericilikdə müəyyən boşluqların mövcudluğu sosial şəbəkələrdə insanların şərəf və ləyaqətinə toxunulmasına yol açır. Bundan heç kim sığortalanmayıb. İstənilən halda hər yaxşının yaxşısını seçmək lazımdır”. Bu fikirləri Bakı Şəhər Gənclər və İdman Baş İdarəsinin rəisi Raqif Abbasovun SalamNews-a müsahibəsində deyib.

- Raqif müəllim, Bakı Şəhər Gənclər və İdman Baş İdarəsinin cari ilin 6 ayı üçün nəzərdə tutduğu tədbirlər planının hazırkı icra vəziyyəti necədir?

- Bakı Şəhər Gənclər və İdman Baş İdarəsi olaraq təsdiqlənmiş tədbirlər planının icrasını davam etdiririk. Hər il olimpiya və qeyri-olimpiya idman növləri üzrə paytaxt birincilik çempionatları, açıq turnirlər, kubok yarışları, spartakiadalar keçirilir. İlk 6 ayın təhlili göstərir ki, sadaladığımız idman növlərində iştirakçıların sayının artmasına nail ola bilmişik.

İdman sahəsində dopinq problemi və dopinqdən irəli gələn bir çox məsələlər, maarifləndirmə tədbirləri davam etdirilir. Yeniyetmələrin Sinqapur Yay Olimpiya Oyunlarındakı uğurlu çıxışından sonra növbəti Olimpiya Oyununa paytaxt yığmasının təkmilləşdirilməsi üzərində iş aparırıq. Eyni zamanda çalışırıq ki, paytaxt idmançılarının ehtiyat qüvvə olaraq Olimpiya Yığma Komandalarının tərkibinə düşmə prosesini həyata keçirək.

- Baş İdarənin beynəlxalq əlaqələri necədir?

- Bakı Şəhər Gənclər və İdman Baş İdarəsinin beynəlxalq əlaqələri ildən-ilə inkişaf edir. Hazırda Baş İdarənin 2 nümayəndə heyəti Rusiyanın Vladimir və Ukraynanın Lvov şəhərində səfərdədir və əməkdaşlıqla bağlı danışıqlar aparılır. İlin ikinci yarısında da beynəlxalq əlaqələrin inkişafı istiqamətində müvafiq addımlar atılacaq. 2014-cü il Qış Olimpiya Oyunlarına ev sahiblik edəcək Rusiyanın Soçi, universiadanı qəbul edəcək Kazan, yeniyetmələr və gənclər arasında Qış Olimpiya Oyunlarını keçirəcək Trabzon şəhərləri ilə əməkdaşlığı gücləndirəcəyik.

Eyni zamanda İran İslam Respublikasının Qəzvin şəhərindən nümayəndə heyəti bizim bir neçə yarışlara qatılıb. Nümayəndə heyətimiz Berlindəki beynəlxalq yarışlarda iştirak edib. Tədricən bu əlaqələr genişlənməkdədir.

- Son vaxtlar gənclərin sosial şəbəkələrin mənfi təsiri altına düşdüyü müşahidə olunur. Sizcə, bu nəyin nəticəsidir?

- Sosial şəbəkələr XXİ əsrin reallığıdır. Düzdür, qanunvericilikdə müəyyən boşluqların mövcudluğu bu gün sosial şəbəkələrdə insanların şərəf və ləyaqətinə toxunulmasına yol açır. Bundan heç kim sığortalanmayıb. İstənilən halda hər yaxşının yaxşısını seçmək lazımdır.

Sosial şəbəkədə azərbaycançılıq ideyası, Üzeyir Hacıbəyovun müsiqisi, işğal altındakı torpaqlar, Azərbaycan həqiqətlərinin dünyaya çatdırılması təbliğ olunsa, bu, yaxşıdır. Gənclərə təsir mexanizmi nöqteyi-nəzərindən sosial şəbəkə həm də bir vasitədir.

- Soçidə keçiriləcək Qış Olimpiya Oyunlarına könüllülərdən ibarət qrupların yaradılması hansı mərhələdədir?

- Bakıda keçirilən MDB idman nazirlərinin toplantısında Rusiya və Azərbyacanın idman nazirlikləri arasında müqavilə imzalandı. Bu ilk addım idi. Hesab edirik ki, Soçidə Azərbaycan nümayəndə heyəti iştirak edəcək. Sadəcə olaraq say, tərkib barədə indidən məlumat vermək tezdir.

- Paytaxtda fəaliyyət göstərən bir sıra idman qurğularının Bakı Şəhər Gənclər və İdman Baş İdarəsinin balansına keçirilməsi təşəbbüsü ilə çıxış etmişdiniz. Bu proses nə zaman reallaşacaq?

- Artıq respublika üzrə olimpiya idman komplekslərinin sayı 31-ə çatır və bu, hələ son deyil. Hazırda 9 Olmpiya İdman Kompleksinin tikintisi həyata keçirilir, onlardan təxminən 5-i bu il istifadəyə veriləcək. Paytaxtda mövcud olacaq idman qurğuları da bəllidir. Onların mərkəzləşdirilmiş şəkildə idarə olunması nöqteyi-nəzərdən idman qurğularının paytaxt idarəsinə verilmə ehtimalı artır.