Azərbaycan Təhsilində Yenilik: Variativ Dərsliklər

[Blok]

Bu ildən Azərbaycanda məktəblilərin bəzisi ilk dəfə olaraq variativ dərsliklərdən istifadə edəcək. Söhbət eyni sinif üçün alternativ dərsliklərin tətbiqindən gedir. Ümumiyyətlə yeni tədris ilinə dərsliklərin çapı başa çatmaq üzrədir. Təhsil Nazirliyinin açıqladığı məlumatlara görə, dərslərin başlamasına 6 gün qalmış 194 dərslikdən yalnız 6-sı çap olunmayıb.

Bu il 4 milyon nüsxədən artıq dərsliyin çapına büdcədən 8 milyon manat vəsait ayrılıb. Bunu ANS-ə açıqlamasında Təhsil Nazirliyinin Dərslik və Nəşriyyat şöbəsinin müdiri Faiq Şahbazlı deyib. Onun sözlərinə görə, bütovlükdə 194 adda dərsliyin və metodik vəsaitin çapı nəzərdə tutulsa da, 188 adda dərsliyin nəşrini gerçəkləşdirmək mümkün olub. Təhsil Nazirliyi iş dəftərləri ilə bağlı narazılıqları da bu il nəzərə alıb və yalnız I və V siniflərdə iş dəftərlərini komplektin tərkibindən çıxarıb.

“Əvvəlki I, II, III və IV siniflərdə komplekt 3 hissədən ibarət idi. Dərslik, iş dəftəri və müəllim üçün metodik vəsaitlərin çatışmazlığına görə yerlərdən bizə müraciət olunurdu. Bəzi valideynlər bunu ala bilmirdi. Almayanda isə bizim siyasətimiz yerimirdi. Axı, bütövlükdə 3-nü nəzərdə tutmuşuq. Bir daha xatırladım ki, iş dəftərləri ancaq I və V siniflərdə ləğv olunub. Yəni, II, III və IV siniflərdə iş dəftərlərindən əvvəlki qayda üzrə istifadə olunacaq”, - deyə o vurğulayıb.

Faiq Şahbazlının sözlərinə görə, gələn il iş dəftərlərinin ləğvi II və VI siniflərdə tətbiq olunacaq və bu iş hər il mərhələli şəkildə həyata keçiriləcək. Amma eyni zamanda poliqrafiya müəssisələrinə də iş dəftərlərinin çapında sərbəstlik verilib. Təhsil Nazirliyində düşünürlər ki, iş dəftəri əlavə resurs kimi hər bir şagirdin bilik səviyyəsinin artırılmasında əhəmiyyətlidir. Bu il daha bir ciddi yenilik isə variativ dərsliklərin hazırlanması ilə bağlıdır. Artıq V sinifdə 3, I sinifdə 2 dərslik variativdir. “Ola bilsin 5 rayonun məktəbləri bir ədəbiyyat keçsin, 6 rayon məktəbi başqa bir ədəbiyyat. Məsələn eyni şeri hərə bir cür izah edir, bizə o şer yox, standart lazımdır. Standarta ola bilsin bir müəllim kollektivi bir yolla, o biri kollektiv başqa yolla çatır”, - deyə nazirlik nümayəndəsi bildirib.

F.Şahbazlı deyir ki, bu gün dünyanın hər yerində variativ dərsliklərdən istifadə olunur. Məsələn, əgər Türkiyədə eyni sinifdə 10 cür türkcə keçirilirsə, Braziliyada eyni sinif üçün bir dərslik 105 adda çap edilir. Təhsil ekspertləri hesab edir ki, variativ dərslik həm də ən yaxşi biliyə yiyələnmək üçün seçim imkanıdır.