BAKIDAKI “MCDONALDS”lar TERROR HƏDƏFİNDƏ

[Чародей]

ABŞ Dövlət Departamenti Azərbaycanda yaranmış terror təhlükəsi ilə bağlı Amerika vətəndaşlarını xəbərdar edib. “Assoşeyted Press” agentliyinə istinadən dünən “USA Today” qəzetində, “Fox News” kanalında və digər ABŞ KİV-lərində yayılan xəbərlərə görə, Dövlət Departamenti bəyan edir ki, Azərbaycandakı “Qərb hədəflərinə” qarşı terror təhlükəsi yaranıb və bununla bağlı Amerika vətəndaşları ehtiyatlı olmalıdır.

Xəbərdarlıqda deyilir ki, təhlükə barədə siqnal ABŞ-ın Bakıdakı səfirliyindən daxil olub. Orada deyilir ki, Azərbaycanda Amerika maraqları da daxil olmaqla, bir çox Qərb hədəflərinə qarşı potensial terror təhlükəsi yaranıb. Bu səbəbdən Birləşmiş Ştatlar vətəndaşlarına tövsiyə olunur ki, ictimai yerlərdə, xüsusən də Qərb maraqlarının yerləşdiyi ərazilərdə sayıq olsunlar. Lakin xəbərdarlıqda terror təhlükəsinin xarakteri və onun arxasında hansı qüvvələrin dayandığı barədə məlumat verilmir. Dövlət Departamentinin rəsmiləri məsələ ilə bağlı əlavə şərh verməkdən imtina edib.
İş günü olmadığından bu xəbərdarlıqla bağlı ABŞ-ın Bakıdakı səfirliyi ilə əlaqə saxlaya bilmədik. Səfirliyin rəsmi internet saytında isə terror təhlükəsi ilə bağlı olduqca ilginc qeydlər var. Orada deyilir ki, Azərbaycandakı ABŞ maraqlarına qarşı potensial hücumlar ola bilər. Məlumatda Azərbaycandakı Amerika vətəndaşlarına, xüsusilə Qərblə assosiasiya olunan ictimai yerlərdə sayıq olmaq tövsiyə edilir.
Təhlükəsizlik ekspertlərinə görə, Dövlət Departamenti səviyyəsində xəbərdarlığın edilməsi o deməkdir ki, daxil olan siqnal kifayət qədər ciddidir və ABŞ-ın Bakıdakı səfirliyi potensial terror təhlükəsi ilə bağlı konkret məlumatlara malikdir. Çox güman ki, məsələ ilə bağlı ABŞ və Azərbaycan xüsusi xidmət orqanları da məlumatlıdır. Səfirliyin saytındakı xəbərdə xüsusi qeyd olunan “Qərblə assosiasiya olunan ictimai yerlər” ifadəsi də çox ilgincdir. Heç şübhəsiz, burada söhbət paytaxtımızdakı “McDonalds” restoranlarından gedir. Bu obyekt bütün dünyada ABŞ-ı assosiasiya edən ən parlaq “ictimai yer”dir.
Bu xəbərdarlıq Azərbaycanda hicab məhdudiyyətləri ilə bağlı davam etməkdə olan gərginlik, habelə İranla münasibətlərin gərginləşməsi ilə üst-üstə düşür. İranın xüsusi xidmət orqanlarına bağlı çevrələr neçə vaxtdır ki, Azərbaycanı təhdid edən mesajlar verirlər. 2008-ci ildə isə İran xüsusi xidmət orqanları tərəfindən Bakıdakı İsrail səfirliyinə qarşı terror planının qarşısı son anda alınıb; bu planı həyata keçirmək üçün göndərilən “Hizbullah” agentləri həbs olunub. Lakin indiki terror təhlükəsinin İran yox, “əl-Qaidə” qruplaşmasından da gələ biləcəyi istisna deyil.
Bu cür təhlükə barədə 2007-ci ildə də xəbərdarlıq edilmişdi. Həmin ilin oktyabrında ABŞ-ın Azərbaycandakı səfirliyi Bakıdakı ABŞ vətəndaşları arasında səfirliyin təhlükəsizliyinə təhdid yarandığı barədə məlumat yayıb. Təhdidlə əlaqədar olaraq səfirlik bağlanıb, həmçinin Böyük Britaniyanın Bakıdakı səfirliyi, bp şirkəti də iş rejimini məhdudlaşdırıb. Təxminən iki-üç gün sonra məlum olub ki, bu xəbərdarlıq Azərbaycanda “əl-Qaidə”yə bağlı qruplaşma tərəfindən Bakıdakı Amerika səfirliyinə və digər Qərb maraqlarına qarşı hazırlanan terror planı ilə bağlı olub. Azərbaycan Milli Təhlükəsizlik Nazirliyinin keçirdiyi əməliyyat zamanı qruplaşma üzvləri həbs olunub, onların planının qarşısı alınıb.